Koinsanai susumikul id watas poonsokid kosudong mamaramit RMT om KWAMP

Keningau:. I Puru Parlimen Pensiangan Tan Sri Joseph Kurup (gambar), minoboros do pogonuan disio kopomodulianan i komi do tongo’ molohing ngaawi’ kokomoi do susumikul nodi poinrojistor doid e-kasih i kosudong kaanu koponguhupan Ababayan Palan Takanon Pomoruhang (RMT) om Tinimungan Tusin Amanah Susumikul Mosikin (KWAMP) id watas Pensiangan.

I Kurup i po nogi’ Kumoduo Montiri Tadon Sandad om Sandad Posorili’ minoboros do lalansanon rayat amu’ kosokodung do kinomogoton nokomoi sabab id watas Pensiangan, somok om koinsanai di susumikul kosudong rumamit koponguhupan ngaawi’ dilo’ nokomoi. Kobolingkahangan di miagal nosili po nogi’ do bobohiton id poliliput pogun.
Pinointalang disio do iso’ mitingan pinaharo montok papatantu’ susumikul id watas poonsokid kosudong mamaramit ababayan RMT miagal di toririmo.

“Potontuon ku o kobolingkahangan diti do asalasai tosiisikap,” ka disio di maso minoboros id ramai kinopoimaganan Walai Koubasanan Kampung Tonomon, Mukim Sepulut do hiti i notindapou po nogi’ di Kumoduo Luguan Umno Bohogian Pensiangan i Ahuar Rasam.

Ahal kokomoi do ababayan RMT dilo’ nosili tulu pogibaabarasan doid watas poonsokid nosusuhut do haro koburilongon kokomoi di amu’ kotiu’an doid kinopouludan ngaran maamaramit.

Pogulu diti haro susumikul i kikosukupan i pinoulud sabaagi mamaramit, nga’ ka di Kurup, kogumuan susumikul id watas poonsokid kikopotutan do rumamit koponguhupan dilo’.
“Okito ku kogumaun susumikul i songinsikul doid watas poonsokid nopo nga’ mantad paganakan di amu’ songkuro kikosupan om kikopotutan do rumamit dilo’,” ka disio do pinopsotol.
Id ramai di miagal, ruminait i Kurup do foom kosompuruan soginumu’ do 130 tulun suminuang do Parti Bersatu Rakyat Sabah (PBRS) i komoyon disio do iso’ po ginoris do Barisan Nasional (BN) id watas dilo’.

Naamot dino i Ahuar i minanahak po nogi’ do booboroson id ramai dilo’ minoboros do rayat watas dilo’ monongkounsikou kumaa di Kurup i nokopogowit ogumu’ kinosimbanon kaampai no id kinopongundaran di tongo’ walai tanaru.
Minoboros isio do mogigiyon Murut kiguno sumodia’ mamaramit kotundaon sabab nung amu’ nga’ oburilong yolo’ om oiduanan. “Nung mogiodu tokou pasal do kotundaon, oiduanan tokou… mimang tokou do kotunda’ tinaru tokou,” ka disio.

Sum. Akhbar....